२८ कात्तिक, काठमाडौं ।
नेपाली कांग्रेसका नेता गगनकुमार थापाले सर्वोच्च अदालतको विवादमा मौन बसे पार्टीले ठूलो मूल्य चुकाउनुपर्ने बताएका छन् ।
आइतबार बसेको केन्द्रीय कार्यसमितिको बैठकमा बोल्दै थापाले पार्टीको मौनतामाथि प्रश्न उठाएका हुन् । प्रधानन्यायाधीश चालेन्द्रशम्शेर जबराको राजीनामा माग गर्दै नेपाल बार एशोसिएसन आन्दोलनरत छ भने सर्वोच्च अदालतकै न्यायाधीशहरु पनि इजलासमा बसेका छैनन् । तर सरकार र सत्तारुढ दलहरु यो विवाद अदालतको आन्तरिक भएकाले उसैले सल्टाउने भन्दै मौन बसेका छन् ।
उनले सत्तारुढ दलहरुको समन्वय समितिमा पनि यसबारे छलफल गर्न वरिष्ठ नेता रामचन्द्र पौडेलको पनि ध्यानाकर्षण गराएका छन् । पाँच दलले बनाएको समन्वय समितिमा आलोपालो नेतृत्व गर्ने सहमति अनुसार अहिले पौडेल संयोजक छन् ।
केन्द्रीय सदस्य थापाले नेता पौडेललाई अदालतको विषयमा समन्वय समितिमा छलफल गरेर निकास दिनुपर्ने बताएको एक केन्द्रीय सदस्यले जानकारी दिए ।
संवाददाता । २८ कार्तिक २०७८, आईतवार १९:१६ बजे